శ్రీ వరలక్ష్మీ, వ్రతం పాట.

11/08/2023.

*తపస్వి మనోహరం E-book  కొరకు కవిత*

అంశం :  శ్రీ వరలక్ష్మీ,  వ్రతం పాట.

అంశం ఇచ్చిన వారు : శంకరప్రియ గారు.

 

 రాగం : ఆనందభైరవి

రచన : శ్రీమతి :  పుల్లాభట్ల జగదీశ్వరీమూర్తి .

కళ్యాణ్ మహారాష్ట్ర అనుపల్లవి

పల్లవి:

-------

నోము ఫలము వినరారే, ప్రియమారా సఖులాలా

కామ దహను సతి  మంగళ  గౌరీ లీలా..

అనుపల్లవి.

---------

శ్రావణ మాసాన వెలుగు చారుశీల

 వాడ వాడలా వెలిగే వరలక్ష్మీ  హేల!!

 

1. చరణం

-------

 పదునారు కళల నోము పడతులు చేయంగా

 అదె  ,చారు మతి కలయై ఇల నిండెనుగా

వ్రత దీక్షలు  నిండిన ఫలితమ్మె మెండుగా

కలిమి నిండు కళకళలతొ ,కలలె పండుగా!!

2.చరణం

---------

చిరు మువ్వల పద రవళుల ,మోమున నగవేలగా

సిరి- సంపద లొసగు శోభ విందు చేయుగా

విచ్ఛేయును వైభవముల నిచ్చు లక్ష్మి గా

అచ్ఛపుటానంద  సిరుల- నవని నేలగా !!

3.చరణం.

--------

కోటి వెలుగు సిరులై కురిసెసేటి తల్లి వేల్పుగా

శ్రావణ మంగళ వారము మహి మంగళ గౌరిగా  

 శుక్రవార పూజలంద, శుభ కల్పవల్లిగా 

శుభములొసగు వరలక్ష్మియె, మముగన్న తల్లి గా !!

---------------------------------

హామీ :

పై కీర్తన నా స్వీయ రచన.