"వృద్ధాశ్రమం".
___________________________
జరుగుతున్నదక్కడో సమావేశం .........
కాన్తిహీనపు కన్నుల్లో
కరడుకట్టిన కన్నీటి పొరలు
కాలచక్రం కింద నలిగిన
బాదాభరిత భాష్యాలు
గడచిన జీవితపు అచ్చట్లు
,పిల్లల పెంపకాల ముద్దు-ముచ్చట్లు
కష్ట్తాల కావిళ్ళ తట్లు
అప్పుల బాధల అగచాట్లు
జీవిత నైరాశ్యపు నగుబాట్లు,
కల్లలైన కన్నీటి నిట్టూర్పు కోట్లు
ఒకరి బాధ ఇంకొకరికి చెప్పుకొని
,తృప్తి పొందే ముసలి జట్లు
అవే వారి మనస్సుకు
తీర్పునిచ్చే టాబ్లెట్లు
బడలికతో వడలిన దేహాలు
బందింపబడ్డ బతుకు భారాలు
నలిగిన మనసుల్లో
నాటుకున్న నైరాశ్యం
ముడతలుపడ్డ ముఖాల్లో
నాదంటూ లేని దైన్యం
వెలసిన రాతి బీటల్లో
గూడు కట్టుకున్న కన్నీటి గాధలు
ప్రతీ జీవితానికి ఒక కధ
ప్రతీ కధలోనీ తీరని వ్యధ
కధల కలం నుంచి వెలువడిన
రంగుల రాతలతో వెలసిన
" వృద్దాశ్రమం" బోర్డ్
మట్టి కొట్టుకుపోయిన మమకారంలా
మసిబారి , వెల-వెలబోతోంది
మారని మనస్సుల కరకు నిర్ణయాల
" కఠినాస్త్రం " లా ....
________________________
రచయిత్రి , శ్రీమతి ,జగదిశ్వరిముార్తి.కల్యాణ్.
No comments:
Post a Comment