కవిత..ఎర్రగులాబీ..

"ఎర్రగులాబీ". 

______________

  

". 

శీర్షిక :ఎర్రగులాబీ

అక్కడ ఉందో గులాబీ తోట 

అందమైన పూలతో విరబూసి

పచ్చని ఆకులతో

 కళకళ లాడుతూ ...... 

చిగిర్చిన చిరు కొమ్మల 

లేలేత పలకరింపులతో 

సేదతీర్చే మత్తైన పరిమళం 

వికసించే పూల వికాస మాధుర్యం 

ఆస్వాదించే తోటమాలి కన్నుల్లో 

కదలాడే జ్ఞాపకాల కలకలం ॥ 

చిన్నారి గులాబీ కొమ్మను 

చిగురింపచేయడానికి 

తపనతో పడిన శ్రమ 

గొప్పులు తీసి ,నీరు పోసి 

కంటికి రెప్పలా కాచే క్షణాలు 

కొమ్మ చిగిర్చిన రోజు 

పులకరింపుతో చిందులేసే 

సంతోష  తరంగాలు ,

అందరికి వినిపించిన 

ఆశల సరాగాలు 

కన్న  కలల 

ఆనంద సౌధాలు ॥ 

మొగ్గ తొడిగిన గులాబీలు 

వికసించిన రోజు 

శ్రమ పడిన శరీరం 

సేదతీరిన ఆనందపు గగుర్పాటు ॥ 

ప్రాణానికి ప్రాణంగా 

పెంచుకున్న ధనం 

చెట్టుపై పెరిగిన మమకారం 

అందని ఎత్తుకు ఎదిగి 

అరవిరిసిన అందం 

తన సొంతమనే గర్వం ॥ 

అందుకుందామన్న ఆతృతలో 

ఆకులచాటున దాగిన ముళ్ళు 

కసుక్కున గుచ్చుకున్నప్పుడు 

తన్నుకొచ్చిన బాధా వీచిక ....  

ఓర్పు నిండిన కంటి తడిలో 

మసకబారిన పూల రంగు 

చివ్వున చిందిన రక్తానికి 

ప్రతీకగా ........." ఎర్రగా" .... 

విచ్చుకున్న"  ఎర్రగులాబీ "

ముళ్ళమధ్య ఎత్తుగా కనిపించింది 

జీవిత సత్యాలకి చిహ్నంగా .... 

_______________________________